Z Gołbina/Gulben. Kaku kondiciju te Gołbinske maju: Su zapust pśez ceły kóńc tyźenja, wót pětka do njeźele, rušnje swěśili. Pó wóžywjenju togo nałoga we tom gołkojskem gmejnskem źěle pśed někotarymi lětami jo se to etablěrowało, až młoźina, dorosćone a źiśi su pśecej gromaźe ducy.

Mjazy nimi jo była teke Antje Steinlandowa z źowkoma Jennifer a Lilly tak ako jeje pśijaśelka Anja Senkelowa ze źowku Larissa. Cłonki młoźiny, ku kótarymž teke Larissa słuša, su se južo pětk za „zaspiwanje“ zmakali. „Mamy źe něnto spiwaŕske z wjelimi titelami, ale probowaś te spiwy weto musymy, pśeto mamy teke nowych wobźělnikow“, jo rozkładła 16-lětna.

Sobotu, 15. februara, jo taka pšawa wjasołosć se pśinamakała. Wokoło 50 mužow, žeńskich, młodostnych a źiśi jo śěgnuło wót doma k domoju, aby zběrało jajka a pjenjeze. Tak su bliski kóńc zymy pśipowěźeli a wšykne k wjelikemu pśeśěgoju ze zapustojskeju reju pó tom pšosyli. How jo teke Antje Steinlandowa z góleśima pódla była. Jo była ducy ako rožojta kokoš: „To ga pasujo k nalěśu, pśeto něnto kokošy zasej wěcej njasu.“