Z Gołkojc/Kolkwitz. Za pěś lět budu twariś na liniji mjazy Lubnjowom a Chóśebuzom druge kóleje. Co to za gmejnu Gołkojce a blisko kólejow bydlecych groni, wó tom su projektowe wjedniki a projektowe inženjery stwórtk tyźeń w gołkojskem radnicowem zalu informěrowali. Su pśipowěźeli, až dostanu Gołkojce a Kósobuz nowej pśistupnišći, ako buźotej 145 m dłujkej. Tak změjo pěś wagonow městno, pótakem jaden wěcej ako do togo. Budu twariś na pśistupnišćach tśibocny domcyk pśeśiwo wětšoju a dešćoju, budu LED-wobswětlenje a dynamiski pokazowaŕ instalěrowaś. Něgajšne pówitańske twarjenje w Gołkojcach budu wótryś. Na pšašanje, lěc fazam totalnego zastajenja linije by pśigłosowali, aby twaŕske źěła se malsnjej mógli pśewjasć, jo wětšyna tudskich rowno tak wótegroniła ako łoni wětšyna we Wětošowje: Su za to. Tak by mógli źěła južo 2026 gótowe byś. Jaden wobydlaŕ jo pšašał, lěc budu tek w nocy twariś. Zastupniki wót DB su gronili, až to njebudu. Su powědali teke wó běžecych zukowych pśepytowanjach a planowanych napšawach pśeśiwo zogoloju.