Z Gór/Guhrow. Zachadny pětk jo pšosyła wejsna pśirada na woklapnicu we wejsnem domje. Powědali su wót togo, až Góry su w lěśe 2019 kšasnje swěśili prědne dokumentariske naspomnjenje pśed 550 lětami.

Až ta kopica aktiwitow jo zmócniła wejsne zgromaźeństwo, jo teke na woklapnicy derje widobne było. Pśisamem 100 mužow, žeńskich a źiśi jo slědowało pśepšosenju wejsneje pśirady, stakim něźi kuždy šesty wobydlaŕ. Zaprědka jo šołtowka Kerstin Jaserowa licby k wěsći dała: „Góry maju 532 wobydlarjow, styri źiśi su se 2019 naroźili. 18 wósobow jo ze jsy pšec śěgnuło, 33 jo nowych we wejsnem zgromaźeństwje. Šesć Górjanarjow jo łoni wumrěło. 52 firmow a pśedewześow jo na Górach pśizjawjonych“

Pótom jo šołtowka se swójim spušćobnym wólbnym pomocnikam a pomocnicam wuźěkowała. Jo pśedstajiła nowe gmejnske zastupniki a zastupnice a jo pšosyła na swóju zjawnu rěcnu góźinu, ako buźo kuždy tśeśi stwórtk w gmejnskem běrowje. Wuźěkowała jo se teke kameradam a kameradkam dobrowólnych wognjowych woborow susednych jsow, pśeto wjas Góry swójsku woboru njama, a jo zasej wjele pódpěry dostała.