Rybakarje su łoni 4.435 kg młodych rybkow do rěkow a tšugow sajźili. To su pó rědu: 1.677 kg šćipjełow a linow, 2.300 kg karpow a 458 kg wugorjow. Togo tak pomjenjonego „běłego drobjaza“ njejsu zewšym do rěku pušćili. To jo gronił ten zagronity za sajźanje młodych rybow Oliver Lehmann. Až to sajźanje něco pśinjaso, jo se wuznało z monitoringa, ak jo se gótował łoni w Małksy – jo gronił pśedsedaŕ Siegmund Lehmann. Tam su nałapali mjazy drugim wjele wugorjow, ak su byli 30 cm dłujke – to groni, až wóni su 20 cm narosli. A to jo zmysł togo sajźanja: młode rybki deje w rěce rosć a pśiběraś, tak ako bur sejo a naslědku žnějo, což jomu na roli narosćo.
Grono wót projektow k lěpšemu natury
Pśedsedaŕ Siegmund Lehmann jo wulicował wót wšakich tšojenjow we łońskem lěśe. K tym samym jo słušało bagrowanje Sprjewje, comuž pśedsedaŕstwo se wjaseli. Pśeto pśez to, až zagaśona wóda w rěce dłujko stoj abo pómałem běžy, wótsajźijo se wjele pary, a to njejo derje za ryby.