Z Gołkojc/Kolkwitz. Gołkojskej gmejnje móžo se wótněnta z połnym pšawom groniś „Nimsko-serbska gmejna“. Tobias Dünow, statny sekretaŕ za kulturu Bramborskeje a nowy zagronity za nastupnosći Serbow, jo pśepowdał toflu z tym titelom šołśe Karsten Schreiberoju pśi góźbje gmejnskego pśiwitanja nowego lěta slědny tyźeń stwórtk. Wón jo wušej togo pócesćił dwa projekta, ako stej wordowałej z gmejny pśipowěźonej za wuběźowanje „Łužyca – serbski pśichod“. Jadno myto jo se dostało jatšownym spiwaŕkam Domowinskeje kupki w Rubynje. Wóni su 2017 wótžywili stary nałog jatšownego spiwanja: Jatšownicu zajtša, nježlic słyńcko zejźo górjej, śěgnu wóni spiwajucy pó jsy a zapowědaju powěsć wót górjejstawanja Kristusa. K nim słušaju žeńske ze jsow gołkojskeje gmejny. Jich powědaŕka Ines Neumannojc jo pśipowěźeła, až lětosa budu dalšne spiwaŕki se jim pśizamknuś, a to z Brodkojc (Brodtkowitz) a z Pódgole. Lětosa jatšy budu spiwaś w Limbarku. Te spiwaŕki su teke spiwali na tom wjacoru, a to jo był ten nejwěcej gnujucy źěł togo pśiwitanja nowego lěta.