Z Barlinja/Berlin. Wěcej ako 100 luźi jo se zgromaźiło stwórtk tyźeń na kjarchobje w Barlinju-Lichterfelźe, aby dali slědne bóžemje Měto Pernakoju, serbskemu procowarjeju, ako jo tudy njezjapki 8. januar wu­mrěł. Pśi kašću w kjarchobowej hali jo faraŕ Helmut Hupac źaržał Bóžu słužbu, faraŕ Cyril Pjech we prjatkowanju wobspominał zamrětego ako lubujucego cłowjeka a nana, kótaryž jo wjele swójej familiji dał, a jo był we cełem wjelgin pśijazny luź. Na serbske jo wón lazował artikel k cesći zamrětego z Casnika, z pjera dr. Madleny Norbergoweje. We hali a pśi rowje jo Juliana Barukojc wuspiwała kjarliž Něnt comy śěło zakopaś.