Na Filmowem festiwalu su pokazali mjazy drugim film Sehnsucht z lěta 1990, nawjerśony za nowelu Jurija Kocha „Wišnina“, kótaraž jo we swójom casu we wjelikem nakłaźe wujšła a se do wjelich rěcow pśe-stajiła. Jurij Koch jo ten film na festiwalu woglědał, prědny raz pó 30 lětach. Film wulicujo wót dramatiskego gromadustarcenja tradicionelnego, burskego swěta z nowym, techniskim, a wóno jo zapakowane do lubosćinskego tšojenja a sajźone do serbskeje scenerije: Wó jadnu žeńsku fryjujotej dwa muskej, jaden z jeje samskeje jsy, bur, a jaden cuznik, inženjer. Z tym burskim jo wóna zlubjona, wón pak pśisajźijo skóro we njegluce žywjenje: jěźecy z kutšu walijo se do gatu a se zalejo. Ta žeńska zalubujo se do togo inženjera, a pśesednjo se z nim ze swójogo pśinaroźonego wejsnego swěta do dalokego města we cuzbje. Tam pak wóna njejo glucna. We sni zjawja se jej ten znjeglucony něgajšny lubki weto zas a zas, a raz stśělijo wóna do togo zjawjenja z flinty. Ako k njomu pśistupijo, ga wopokažo se, až jo swójogo nowego cłowjeka zastśěliła.