Jurij Koch: Kšet Knut a bur Žur. Ludowe nakładnistwo Domowina, Budyšyn 2014, 8,90 euro.

Znaty serbski spisowaśel Jurij Koch pišo we tych źiśecych knigłach (wót 6 lět) wó burje Žuru, ako ma wjele pólow a bydli we wjelikem domje. Wjelike jo teke jogo gumno. Žywjenje by mógało tak rědne byś! Ale, ale: W jogo rědnem zelenem gumnje jo jadno kšetowišćo pśi drugem. To jo stwóŕba kšeta Knuta. Wón ma bura Žura za naru! Bur Žur ma južo plan, kak buźo jogo wuškaraś.... A ako ten se njeraźijo, no, pón ga buźo drugi plan. A tśeśi. A stwórty....

Naraźenje Jana Dödinga

Mě se groni Janko. Rowno som cytał rědne knigły. Wót nich cu Wam wulicowaś. Knigłam se groni „Kšet Knut a bur Žur“. To jo na nimski: „Maulwurf Knut und der Bauer Sauer“. Pisał jo te knigły Jurij Koch.

W knigłach co bur Žur kšeta wugnaś ze swójogo gumna. Za mnjo jo wjelgin luštne cytaś, wjele razow bur Žur wopyta, Knuta wugnaś.

Bur Žur jo něźi cytał, až pjerwjej su byli kšetarja. Kšetarje zabijaju kšety, gaž bury to kśě. Žur jo se myslił: To mógu teke sam. Nejžpjerwjej wón wopyta, kšeta z grabjenim dostaś. Ale pón derijo sebje sam to grabje na głowu!