Adwent jo cas, źož wjele luźi se pśigótujo na gódy, což młogemu teke stres napórajo. Ale chylku mamy něnto teke, aby wjacor sejźeli z knigłami, za cytanje a glědanje. Togodla comy Wam naraźiś rědnu literaturu za spódobnu lekturu. Smy se pšašali teke našych cytarjow: Co maśo Wy raźi? Wuslědki se namakaju we toś tej „Literarnej pśiłoze“. Pódla su knigły w serbskej a nimskej rěcy. Wšake wót nich su wjelgin aktualne, druge su južo pitśku starše. Smy pak na to glědali, až wšykne naraźone knigły su hyšći na pśedań.Wšak móžomy se pśedstajiś, až jaden abo drugi wót Was hyšći pyta za rědnymi gódownymi darami. Gaž se knigły spódobaju, ako smy naraźili: Wy je móžośo zwětšego dostaś w „Lodce“ w Chóśebuzu (na Droze Augusta Bebela 82). Lodka jo wótcynjona wót pónjeźelego do pětka, pśecej wót zeger 10:00 do 16:30. Tam su knigły ze serbskego nakładnistwa „Domowina“ (LND) na pśedań. Druge knigły ako how pśedstajijomy, móžośo w regularnych knigłaŕnjach kupiś.