Z Budyšyna/Bautzen. Aby serbska rěc we digitalnem swěśe šansu měła – mjazy drugim pśi wobchadanju ze smartfonami, computerami a modernym rědom – jo napinanje trjebne. Pśez to, až luźe, pśedewšym młoźina, wužywaju dlej a cesćej digitalne medije a rěd, ga njejo wšojadno, lěc mógu z nimi teke we serbskej rěcy komunicěrowaś. Njebuźo-li serbska rěc za tym wuwiśim dochwataś, ga wobstoj tšach, až śišć nimskeje rěcy buźo hyšći wěcej pśiběraś, samo we zgromaźeństwach, źož doněnta serbska rěc jo to kněstwo měła. To jo była wucba z konference „Digitalizacija a serbska rěc“ w hotelu Residence, ako jo sobotu organizěrowała Załožba za serbski lud.

Na konferency su se wobźělili zastupniki serbskich institucijow, mjazy nimi Serbski institut, kótaryž jo južo wjele rěcnych resursow digitalizěrował a stwórił zakład za tak wužytne wěcy kaž ortografiska korektura za pisańske programy. Ale teke priwatne entuziasty – awtory serbskeje wikipedije, pśestajarje powjercha (Oberfläche) wšakich wužytnych programow a appow – su se na konferency wobźělili.