Stary gósćeńc we Łazu njejo wěcej gósćeńc – za zjawnosć weto njejo zgubjony. Źinsa jo to Dom wuměłstwa, źož wuměłc Willi Selmer jo góspodaŕ. How wón źěła, wustaja a jo žywy – ako teke gjartnaŕska architektowka Susanne Richterowa a jeju sotša Anna-Rosina Selmerojc. Slědna wót nich jo pśez swójogo pśijaśela Ignaca Wjeselu zwězana z Górneju Łužycu a powěda górnoserbski. Mała ironija to jo, groni jeje mama Susanne: „Som roźona Picanaŕka, mója stara mama jo Serbowka z Gołkojc. Dolnoserbsku rěc som zgubiła, a něnto jo pśišła górnoserbska rěc do familije“.