Muzikaŕska scena jo w Łužycy wjeleseraka. Aby wót togo bogatstwa něco k lěpšemu serbskeje kultury wótkapnuło, to jo wótglědanja Gregora Kliema, organizatora koncerta Popserb pśed dwěma tyźenjoma sobotu. Wón jo wót lěśego pśistajony redaktor w serbskej redakciji rbb a stara se sobu wó muziku. Ta sama dej młody publikum pśiwabiś.
Pśi tom jo jomu k wužytku, až jo sam młody muzikaŕ a wuwucony muzikolog, we scenje derje zwězany. Ako sobuzałožaŕ kupki Die Folksamen a Serbska reja wě wón ze swójogo nazgónjenja, až pśez popularnu muziku móžoš drogu k swójim serbskim kórjenjam a k serbskej zgromadnosći namakaś. Abo interesu młoźiny za to serbske wubuźiś.
Koncert móžoš stakim naglědaś ako glědałko togo procowanja, a pó koncerśe snaź se wěriś suźiś, kak raźone wóno jo a co to něnto groni „nowa serbska muzika“?