Teke w Dolnej Łužycy su młoge luźe južo wiźeli a nejskerjej tež wobźiwowali ten wjeliki kjarchob w Ralbicach/Ralbitz w Górnej Łužycy, źož bydle serbske luźe z katolskeju wěru. Tam stoje we dłujkich rědach na rowach běłe drjewjane kśice, wšykne z małkeju figuru Jezusa a z kulowateju toflu ze špruchom a z mjenim zamrěteje abo zamrětego, źo jo bydliła abo bydlił, ga se naroźiła abo naroźił a wumrěła abo wumrěł. Wšykno za wětšy źěl w górnoserbskej rěcy. Kuždy row, kužda kśica jo tak ako ta susedna. Se groni, až dej to pokazaś, až jo kuždy pśed bogom rownopšawny a jadnaki.