Z Chóśebuza/Cottbus. „Pśisamem wšykne programy lětosnego filmowego festiwala maju někaku serbsku źělbu – teliko serbskego njejo hyšći žednje dało na festiwalu“, jo dała Casnikoju k wěsći Grit Lemkowa, sobuorganizatorka festiwala a zagronita za jogo serbsku źělbu.
Ceło prědku stoj – to se wě – zasej sekcija Domownja/Heimat. Južo srjodu, 6.11., pokažo se we Obenkinje film Sehnsucht (Jürgen Brauer, 1989) na zakłaźe znateje nowele z pjera Jurija Kocha „Wišnina“. Wón wulicujo wót lubosći: Źowćo ze serbskeje jsy zalubujo se do inženjera, cuzabnika, kótaryž „twari jazory a pśinjaso techniski póstup“.