Z Města/Chóśebuz. K tym 9 partnaŕstwam, ako źaržy město Chóśebuz z drugimi městami w Europje, słuša to z městom Montreuil pla Parisa. Wóno jo to nejstarše a bu 1959 wobzamknjone. Za Chóśebuz jo to pśed 60 lětami pódpisał tegdejšny wušy šołta Heinz Kluge.

Na pósejźenju noweje měsćańskeje zgromaźiny 25. septembra su na ten jubilej spominali. K tomu běšo mócna delegacija z Francojskeje pśijěła, mjazy nimi Patrice Bessac, jich šołta. Wón jo we swójom gronje na to pokazał, až wobej měsće stej južo pśed 1989 wopytałej, njeglědajucy na śěžkosći, kontakty mjazy wobydlarjami woplěwaś.

Pśi góźbje jubileja su w Chóśebuzu teke witali gósći z města Saarbrücken, z kótarymž ma dolnołužyska metropola wót lěta 1987 partnaŕstwo. Wšykne te partnaŕstwa su pśežywili wšake politiske systemy. Wóni pak su źinsa rowno tak wažne – jo k tomu gronił prof. Heiko Lukas, decernent w głownem měsće Saarlandskeje.