Slědny tyźeń jo w dešańskem muzeju prědny raz był pleinair z wuměłcami z cełego regiona pód motom „Pód gołym njebjom“. Wjednica muzeuma Babett Zenkerowa, wjednik zeloweje zagrodki Camillo Steinfurth a Šula za dolnoserbsku rěc a kulturu su na to kazali. Pśijěli su wuměłce z Chóśebuza, Łukowa a Lubnjowa, z Kalawy, Zaspow, Rubyna a Picnja. Źěłaŕnju jo nawjedowała Gabriele Gittelowa, ako w Chóśebuzu wuměłstwowy kružk na starosći ma. Wóna jo rozkładowała zasadne znajobnosći perspektiwy a proporcionow, pótom su se zgromadnje dali do pytanja motiwow. Wóni su se rozglědowali w muzejowej jsy Stary lud, zelowej zagrodce, muzeju a w cerkwi. Motiwow jo było dosć a nadosć. Babett Zenkerowa jo pśechwatanje pśigótowała a jo pśepšosyła pěsnikarja Bernda Pittkuningsa a kupku „Pśezpolne“ z Górneje Łužyce. Kšasnje su spiwali. Serbski flair wšuźi, źož sy glědał a pśisłuchał, k tomu dobra a pśijazna atmosfera za mólowanje a kreatiwne statkowanje. Wuměłce su mógali swóje mólby na wustajanišćach pśedstajiś a pśedawaś.