Smogorjańska młoźina jo sobotu, 10. awgusta, swěśiła swój tradicionelny žnjowny swěźeń. Pěś źowćow jo pśišło w serbskich drastwach, a šesćo gólcy su pśišli z cepami. Jadnab 200 gósći jo pódla było a jo kśěło se woglědaś, kak młodostne zabijaju kokota. Rozmjej: wót 1950ych lět woplěwaju w Smogorjowje jano to zabijanje kokota. Młodostne su pokazali, až kśě tu staru tradiciju woplěwaś. Końcakojc Anja (šefowka młoźiny) jo to komentěrowała: „Wěmy, až smy zagronite za dalejdawanje nałogow. Buźomy wšykno cyniś, aby dalšne generacije mógali swěśiś tak ako naše prědowniki.“

We swěźeńskem pśeśěgu jo Klupšojc Niklas njasł žnjownu kronu. Pótom jo Anja wuwitała gósći w nimskej rěcy, Schäferojc Laura w serbskej rěcy.

Něnto su wšykne napněte byli, wšak su gólcy něnto dejali pokazaś, kak derje mógu wobchadaś z cepami. Cepy ga su skerjej historiski rěd, ako su naše prědowniki wužywali. Wósebne wupominanje jo, až gólcy maju zawězane wocy. To groni, až njamógu wiźeś, źo wóni biju z cepami. Njejo tak lažko, ten gjarnc pód takimi wobstojnosćami trjefiś!