Z Janšojc/Jänschwalde. 31. měrca su swěśili w Janšojcach rědnu serbsko-nimsku namšu. Wokoło 80 namšaŕkow a namšarjow jo tam dožywiło prědne prjatkowanje dr. Hartmuta Leipnera. Wón tuchylu absolwěrujo dokubłanje ako lektor. Lektory maju dowólnosć sam namšy pśewjasć, ako cytanu namšu. Bratš Leipner jo měł z teju namšu swóju premjeru ako lektor. Dokubłanje trajo hyšći pór mjasecow.

Za młogego serbskego namšarja jo to było wjelke dožywjenje. Njamamy ga wjele lektorow. Bratš Mucha z Turjeja jo južo dojśpił cesne starstwo. Tak jo był bratš Pittkunings z Města wěsty cas ten jadnučki aktiwny letkor, ako wumějo našu rěc. Manfred Hermaš z Rownego jo predikant. Wón ma z tym hyšći dalšne pśizwólenja ako lektory. Predikanty směju prjatkowanja napisaś. Liche wuzjawjenje słowa (freie Wortverkündung), groni se tomu w amtskej rěcy cerkwje. Predikanty mógu teke Bóže blido pśewjasć.