Ze serbskego domu. Teke za lětosa jo Domowina dostała wót energijowego koncerna LEAG pjenjeze darjone, kótarež su wósebnje mys-lone za Dolnu Łužycu a za slěpjańske strony, a to głownje za spěchowanje serbskeje rěcy a kultury. Pśedsedaŕstwo Domowinskeje župy Dolna Łužyca jo toś pšosyło głownje Domowinske kupki a towaristwa, aby k tomu zapódali swóje konkretne pšosby a projekty, a pśisamem 30 takich jo za to pjenjeze dostało – mjazy drugim z kupkow w Mósće, Janšojcach, Rogowje, Radowizy, na Górach a w Rubynje – a wót młoźinskich Domowinskich kupkow w Bórkowach, Smogorjowje a Žylowje. Teke žedne towaristwa, ako Spěchowańskej towaristwje za Dešański muzej a Serbski muzej a towaristwo „Serbske koparje“ su zapódali swóje projekty, rowno tak ako Šula za dolnoserbsku rěc a kulturu.

Župne pśedsedaŕstwo jo se na swójom pósejźenju kóńc měrca z tymi pšosbami zaběrało a jo teke wětšy źěl z nich pśizwóliło. Wšykne dostanu za krotki cas powěsć k tomu.