Z Dešna/Dissen. Dešno ma zasej wjele prědk. W lětosnem wuběźowanju „Naša wjas ma pśichód“, ako se pśewjeźo w cełej Nimskej, kśě dobyś złoto. To by pón było tśeśa wjas w Bramborskej wót wobstaśa našogo kraja a prědna łužyska wjas. Tšupc ga jo dobył pśi slědnem wuběźowanju slobro.
Až take něco njejo lažko, to se rozmějo. Dla tog dostanu Dešanarje pódpěru wót bórkojskego amta, wót wokrejsa Sprjewja-Nysa a samo wót kraja (glědajśo na foto). Dla tog su se zmakali 28. měrca Kerstin Möbes (bórkojski amt), Simone Schöckel (krajny amt za nakrajne wuwiśe a rolnikaŕstwo LELF), Helke Elsner (ministaŕstwo za nakrajne wuwiśe, wobswět a rolnikaŕstwo MLUL), zastupna šołtowka w Dešnje Katja Hoffmann a šolta Fred Kaiser w muzeumje Dešno. Kněni Schöckel a kněni Elsner stej zagronitej w Bramborskej za to wuběźowanje.