Wót adwentskeje wustajeńce we Husu (wjas słuša ku Gatojcam) smy južo na prědnem boku pisali. Wóna jo była wjelgin rědna a jo wótbłyšćowała, z cym se luźe we tej jsy zaběraju. Pśechwatanje jo było, až wót tych jadnab 550 wobydlari telik luźi w lichem casu wobźěłujo drjewo. Pitśku luštowański jo to Christian Tobias ze jsy komentěrował: „Wu nas jo se pśed 50 lětami pśewaliła lipa, to smy zachopili tšugaś.“ Teke w casu DDR su luźe ten hobby woplěwali. Dietmar Jurtz jo wulicował, až jo pśed 10 lětami stwórił bujku za enkelsyna, a wót togo casa gótujo drjewjańske źěła. Druge su gjarncarske a tekstilne produkty prezentěrowali na tej wustajeńcy, a pcołkaŕ Karl-Heinz Morstein ze žeńskeju Moniku stej měłej wulate wuměłske twórby z pcołkowego wóska kaž tež swěcki. Inge Valderowa na swój part jo pokazała wjelike patchworkowe źěła, te ale njejsu na pśedań byli. Wóna jo měnjeca, až luźe njeby telik pjenjeze dali, ako to dejało płaśeś. Teke jeje cłowjek Hermann njejo kśěł pśedawaś swóje drjewowe stwórby, jo jano kśěł je pokazaś. Wón jo stwórił swóju interpretaciju janšojskeje milinarnje a Picańskich gatow.