Z Chóśebuza/Cottbus. Na kšomje pósejźenja Serbskeje rady w nowemberje jo se wšake pokazało za Serbski muzej w Chóśebuzu. Wón co swóje pedagogiske póbitowanja wutwariś a rozšyrjaś. Na pósejźenju Rady w Pódstupimje jo gronił wjednik muzeja Steffen Krestin, až su se dojadnali na to, až kśě docakaś, až pójźo jaden tych kuratorow na wuměńk. Pótom kśě to městno tak pśeměniś, až mógu pedagoga pśistajiś. To pak ma swóju słabosć we tom, až se licba kuratorow wót něnto tśoch na dweju znižyjo. To groni, až na wědomnostnem pólu njebudu móc zasej tak wjele źěłaś.

Na kšomje togo pósejźenja su se pak teke dalšne perspektiwy wótwórili. Do mikrofona rbb jo groniła Sabina Siegowa wót Załožby za serbski lud, až rowno wuzgónjuju pótrjebnosći za nowe financne dogrono, kótarež dej płaśiś wót lěta 2021. We tom ramiku jo móžno groniś, za co nowe źěłowe městna notne su. Pśi tom njejo južo doprědka wuzamknjone, až Serbski muzej dostanjo źěłowe město za muzejowu pedagogiku. „Ale muzej až doněnta njejo žednu pšosbu za to pśi nas zapódał“, jo groniła.