Pórik na gnězdźe we kormoranowej koloniji. Rybakarje póžedaju, až dej byś pśiwdane kormoranowe jaja wuběraś a stakim populaciju kormoranow reducěrowaś. 
Z Bórkow/Burg. Serbske rybakarje póžedaju, aby licbu kormoranow w Bramborskej reducěrowali. Nejlěpša metoda jo za jich zdaśim kóńcowanje abo wuběranje jajow we gnězdowych kolonijach. To póžedanje su wóni pśednjasli Serbskej raźe na jeje slědnem wobradowanju wałtoru tyźeń w Domje zmakanjow. Serbska rada jo wobzamknuła, až buźo jich nastupnosć pśednjasć bramborskima ministarstwoma za góspodarstwo a za rolnikarstwo.
Towaristwo serbskich rybakarjow Bórkowy a wokolina jo zastupował Matthias Gutschmidt z Dešna, jomu jo pó boce stojał Michael Kohde z Picnja, cłonk rybakarskeje pśirady wokrejsa SPN. Wónej stej nadrobnje rozkładowałej tu škódu na rybach, kótaruž napórajo populacija kormorana – a to su kormorany, kótarež w našych stronach sedaju na jajach, kaž teke pśiśěgarje z drugich stronow.
