Z Pódstupima/Potsdam. Chtož co studěrowaś na ceptarske a wumějo derje serbsku rěc, ten móžo se naźeś, až změjo lažčej studijne město w Pódstupimje.

Bramborske kněžarstwo co za sakskim eksemplom młoźinje, kótaraž powěda serbsku rěc, ceptarski studium lažčejšy wucyniś. Wóni su prědkpołožyli nowu kazń za pśistup k wusokim šulam. We nowej kazni stoj: „Pśi kandidatach, kótarež se procuju wó studium na ceptarske, dej se pśi rozdawowanju studijnych městow we słušnej měrje glědaś na jich pódłymšone znaśa serbskeje rěcy“. To groni: chtož wumějo serbski, ten dostanjo bonus, gaž co studěrowaś fach, źož jo numerus clausus wustawjony. Wšojadno, lěc studěrujo serbsku rěc abo druge fachy. Na ten part reagěrujo politika na brach serbskich wucabnikow, wósebnje za bilingualnu wucbu.