Z Janšojc/Jänschwalde Dwa raza za sobu w běgu 3 mjasecow cytanje ze samskich knigłow (NC jo rozpšawił, 46/15.11.2017) – móžo to funkcioněrowaś? To jo se teke wjednica muzeuma Nadine Adamowa pšašała, gaž jo rozpósłała pśepšosenja za cytanje 8. februara.

Ale wóna jo mógała półnu dowěru měś do wjelikeje wulicowarskeje mócy awtora a mólarja Jürgena Tiedego z Worjejc. Na cytanje z jogo bogaśe ilustrěrowanych bajkowych knigłow za dorosćonych „Złoty proch – kak jo Bogumił kśěł mudrjejšy byś ako cart“ su pśichwatali nic jano z Janšojc, ale tek z Mósta, Picnja, Turjeja, Groźišća a Chóśebuza. Rozpowědało jo se, kake późiwne gusło su pśepasowali zachopjeńk zachadnego nowembra. A wšykne su pśišli na swóje košty. Jürgen Tiede jo cytał na swój wjelicny part, tak až su wšykne byli pśejmane, až by mógał padnjenje glicki wusłyšaś.