To Domowinske źěło jo Christa Elina wjelgin lubowała. Teke pśi wulětach chóśebuskeje kupki jo pśecej sobu była – mjazy drugim w českem Varnsdorfu w tamnej bibliotece. 
Chóśebuz/Cottbus. Zachadna srjoda jo była tužny źeń za serbsku Dolnu Łužycu. Na Pódpołnocem kjarchobje jo wjelika mań luźi pśewóźiła k rowoju popjelnicu (Urne) z popjełom Christy Elineje, teje pśed tśimi tyźenjami zamrěteje, lubowaneje serbskeje wucabnice na wuměńku. Dr. Fabian Kaulfürst jo na žałowarskej swěstosnosći we gnujucem gronje za wětšy źěl w dolnoserbskej rěcy zespominał statki a žywjenje njabogeje, kótarež jo stojało ceło we słužbje jeje serbskeje mamineje rěcy. Zazněli su spiwanja, kótarež jo njaboga lubo měła: Gerald Schön jo spiwał Gaž bóžemje ptaški kśě dawaś, chor Łužyca jo zgłosył ariju Běžy wóda, běžy, ale teke kjarliže kaž Gaž ja tu drogu njewěm... Kai-Uwe Geske jo pśi zakopowanju popjelnice tšubił serbske melodije.
*