Dobre powěsći se w našej medijowej towarišnosći lažko njamaju. Zgubiju se pód dramatiskimi rozpšawami wó wójnach, swětowem bronjenju, wó plastikowych partikelach w oceanach, wó wusokich płaśiznach za bydlenja, žywidła, gónidła pśi tankowni abo za medicinske zastaranje. Kupka luźi, kenž jo pśeśiwo klimowej změnje z nadroznem pśilipowanim protestěrowała, jo se dała pesimistiske mě „Slědna generacija“. Glědaš-li dokradnjej na trajne wuwiśa slědnych 200 lět na swěśe, namakajoš pózbuźujuce wuwiśa: Późěl góletkow, kenž njepśežywijo prědnych pěś žywjeńskich lět, jo se znižył wó 99,8%. Licba analfabet(k)ow jo se pśewobrośiła, jano 1 dorosćony wót 10 na swěśe njamóžo cytaś a pisaś. Licba njabogich pśez pśirodne katastrofy a zanjerěšenje lufta jo se znižyła. Emisije, kenž škóźe oconowej warstwje, su se pó kopicy napšawow reducěrowali. A teke ekstremna chudoba na swěśe, kenž pótrjefijo luźi, ako muse wujś z mjenjej ako tśimi dolarami wob źeń a njamaju pśistup k zastaranju z milinu a z cysteju wódu, jo se jano wót lěta 1990 znižyła wó wěcej ako połojcu.