Z Bórkow/Burg. Njeźelu, 10. maja, jo se wótměła we bórkojskej cerkwi swětocna ordinaciska namša za EKBO – Ewangelska cerkwja Barliń-Bramborska a šlazyńska Górna Łužyca. Ordiněrowałej stej se dwě młodej faraŕce a dwa młodej fararja do swójich zastojnstwow. Tej dwa muskej stej byłej z cerkwinego wobceŕka Chóśebuz. Jaden z nich jo nam južo znaty faraŕ Aleksander Reinfeld z Picnja a ten drugi jo faraŕ Gottfried Wapler, ako pójźo do Popojc a Gołkojc na słužbu. Ordinaciju stej pśewjadłej biskup dr. Christian Stäblein z Barlinja a generalna promštowka Theresa Rinecker ze Zgórjelca. Prjatkowaŕski tekst jo jadnał wó bjatowanju, ako jo pśedpisany za toś tu njeźelu Rogate. Ten tekst jo se wuběrnje góźeł za pósłanje młodej faraŕce a młodeju fararjowu do słužby, źož wóni maju nadawk, za wjele luźi bjatowaś a teke sam pśikład byś we módlenju. Namša jo pśiwabiła wjele luźi, wósebnje z wósadow nowych teologow. Tśi žeńske z Janšojc su byli we serbskej drastwje. Žycymy fararjoma Wapler a Reinfeld bogate Bóže žognowanje a wjaselimy se na dobre zgromadne źěło.