Z Budychowa/Budziechów. Stwórtk do prědnego maja jo se wótměła we jsy Budychow (pólski Budziechów, nimski Baudach) pla Žemrja na pólskem boce Dolneje Łužyce njewšedna swětocnosć. Rozmjej jo se wótekšyła a wuswěśiła tofla k cesći Joachima Leopolda Haupta, roźonego w toś tej jsy w lěśe 1797. Tekst w pólskej a nimskej rěcy mimo jogo žywjeńskich datow pokazujo na jogo póchad z faraŕskeje familije, cłonkojstwo w Górnołužyskej towarišnosći wědomnosćow a sobuźěło z Janom Arnoštom Smolerjom pśi zběranju a wudaśu ludowych spiwow.

We wejsnem zalu jo se pśedstajił pśednosk wjednika Šlazyńsko-Łužyskego muzeja w Žarowje, dr. Szymczaka, k stawiznam Łužyce a statkowanju Joachima Leopolda Haupta a teke jogo syna, Karla Haupta, wudawarja wuznamnych knigłow „Sagenbuch der Lausitz“.