Z Dešna/Dissen. Tradicionelnje stej dešańska młoźina a dobrowólna wognjowa wobora zasej stajiłej 30. apryla majski bom, a to srjejź jsy w Dešnje. Noc k 1. majoju pak njejo wóstała mimo tšojeńkow. Njeznate su wopytali majski bom pódpušćiś. Jich su pak pśi tom mólili a pśez to jo pśišło k biśeju. Drugi źeń jo musała młoźina jadnu zepěru wobnowiś. Pótom njejo se dnja wótwórjonych źuri pśi dobrowólneje wognjoweje wobory nic wěcej na zajźowje stojało. Swěźeń jo se juž dopołdnja zachopił, a to z wuběźowanim w spiwanju kokotow. Źewjeś kokotow jo nastupało, dobył jo kokot Matthiasa Nowaka (Noack). Jogo kokot jo 56 razow spiwał. Dobyśaŕski kokot jo mimo togo nowego wobsejźarja namakał. Katja Hoffmannowa jo se wjaseliła pśirostoju za swój kokošeńc.