Z Janšojc/Jänschwalde. Srjodu, 29. apryla 2026, jo to wordowało w našej źiśowni w Janšojcach bejnje tradicionelnje: Stajanje majskego boma jo se swěśiło z małym programom źiśi ze źiśownje a pśedšulskich źiśi.

Jo pśecej zasej rědnje, toś te serbske tradicije woplěwaś a je źiśam južo wót małego sobu na drogu daś. Togodla su źiśi se wě teke južo pśi pśigótowanjach pomagali: južo wałtoru do togo jo była wjelika źěłabnosć. Z wjele pilnowanim a šykom su źiśi pomagali pśi pleśenju wěnca a girlandy za majski bom. Z pisanymi bantami w serbskich barwach módry, cerwjeny a běły su wěnc pótom teke hyšći wupyšnili. Ale teke za mały program su pilnje spiwali a rejowanje zwucowali.

Srjodu wótpołdnja jo było pótom tak daloko: Źiśi z góletkownje a horta, starjejše ako teke stare starjejše su se zgromaźili, aby zgromadnje swěśili. Majski bom jo stojał južo pśigótowany na swójom městnje, tak až su mógali jen źiśi wob cas programa kšac pó kšacu wupyšniś.