Ze Slěpego/Schleife. Załožba Amadeo Antonio pšosy gmejnu Slěpe wó wódaśe dla tšojenjow na tamnej wušej šuli. To jo šołta Jörg Funda slědny tyźeń wałtoru pśi pósejźenju rady gronił. Slězyna jo, až jo se wuknikam 9. rědownje pśi workshopje w aprylu pornografiski material spśistupnił. Workshop jo se pśewjadł w nosaŕstwje Socialistiskeje młoźiny „Die Falken Landesverband Berlin“ a Załožba Amadeo Antonio jo za to financielne spěchowanje wót 2.500 euro pśizwóliła. Cil jo był, gromaźe z wuknikami sćěnowy wobraz wugótowaś. Pód materialijami jo mimowólnje teke był magacin ze seksualizěrowanymi wopśimjeśami.

„Smy se wobjadne: To njeby dejało se staś“, tak Jörg Funda. Na wuslědki pśespytowanjow policaje hyšći cakaju, wšak kśě w prědnem rěźe škódu wót wuknikow a šule wótwobrośiś. Serbskego šulskego wjednika Jana Hrjehorja njejsu pśi pósejźenju rady pódla měli. Pó šulskem zastojnstwje jo se wón pšawje zaźaržał (jo ten projekt naměsće wótłamał). Jörg Funda jo tek informěrował wó lisće rady starjejšych. Te pšose wó dalšne wujasnjenje tšojenjow .