Z Carneje Plumpy a Grodka/Schwarze Pumpe und Spremberg. W referentowej pśedłoze ku kazni miliny, wěstosći zastaranja a kapacitow (Referententwurf zum Strom-Versorgungssicherheits- und Kapazitätengesetz, krotko: StromVKG) jo nadalej pśedwiźony jaden „Pódpołdnjowy bonus“ za inwesticije do modernych płunowych milinaŕnjow na pódpołdnju a w pódwjacorje Nimskeje. Stoj carno na běłe, až se na inwesticije do milinaŕnjow na pódpołnocy a pódzajtšu njeźiwa. Hynac, ako jo to zwězkowa góspodaŕska ministaŕka Katherina Reiche pśed lětom w Carnej Plumpje zlubiła, grozy pódzajtšnonimskim rewěram, až wujdu z proznymi rukami. Pód motom „Miliardy za pódpołdnjo, prozne zlubjenja za pódzajtšo“ jo pšosył koncern LEAG slědny pětk na protestowe zarědowanje do Industrijowego parka Carna Plumpa. Pominaju fair šanse za pódzajtšne industrijowe městna.