Z Tšupca/Straupitz. Za pśiwześe nowych wucbnych materialijow za serbsku wucbu jo zakładna šula „von Houwald\" Tšupc Charlotte Möllerojc wuzwóliła – nic naslědku dla togo, až ta mjaztym źewjeś-lětna jo pśi swójom zašulowanju 2021 swóju serbsku drastwu nosyła. Charlotte wótrosćo w Mochowje w z tradicijami zwězanej familiji a wóna jo gjarda na to, až jo wót swójeje ceptaŕki za serbšćinu Ute Kieperoweje južo teliko słowow nawuknuła. „W mójej rědowni su teke ukrainske źiśi a smy zwěsćili, až młoge serbske a ukrainske słowa pódobnje klince. Pśez to smy mógali se skóro derje dorozměś“, rozpšawja Charlotte ze zagóritosću. Z rukowu wót Susann Troppineje (Troppa) wót projekta UNESCO 5 jo wóna 16. septembra symboliski pśiwzeła rědownisku sajźbu z memo-graśim, basleńskim setom, bookletom „Pód lapu/Unter der Haube“ a teke zešywkom „Lutki“.