Z Města/Cottbus. Slědny tyźeń pónjeźele jo pśepšosył Serbski muzej w Chóśebuzu na wjacorny pśednosk z titelom „Drastwa jo za rejowanje“. 32 zajmcow jo slědowało pśednoskoju dr. Therese Jacobsoweje, kulturneje wědomnostnice pśi Serbskem instituśe, kenž jo se wótměł ku góźbje aktualneje wósebneje wustajeńce „Drastwa a moda“. Na pyšnych pśikładach jo Jacobsowa rozłožyła wšakorake formy poměra drastwy a rejow mjaz žyweju a prezentěrowaneju kulturu kaž teke kulturnym a kreatiwnym zwikowanim. Za to jo referentka pokazała historiske fotografije a žrědła reje, na pśikład listowe znamki z rejowańskimi drastwami a futuristiske wuměłske pśedźěłanja temy.