Z Blunja/Bluno. Jadnab 50 zajmcow wšych generacijow jo pónjeźele wjacor, 30. septembra, we wejsnem kulturnem centrumje w Blunju na pśedstajenje dokumentacije serbskeje ludowědneje zběrki łoni zemrětego wejsanarja Helmuta Kurja pśichwatało. Ako póbratš a slědny znajaŕ blunjańskeje serbskeje narěcy jo sebje Helmut Kurjo w swójom domje priwatny serbski muzej zarědował, w kótaremž jo zběrał źěle serbskeje drastwy, jatšowne jajka, pódomk a wšaki źěłowy rěd kaž teke rěd z wejsnego žywjenja. Na iniciatiwu Andreje (Andrea) Pawlikoweje ze sekcije za ludowědu Maśice Serbskeje jo młoda abiturientka Hanka Zahrodnikec z Ćiska (Zeißig) w zachadnych pěś lětach zestajała fotowu dokumentaciju zběrki z rukopisnymi wujasnjenjami w nimskej a w blunjańskej serbskej rěcy. Toś ta dokumentacija, kótaraž jo se wjele źěła, casa a entuziazma pominała, jo se něnto z pódpěru Sonje Hrjehorjoweje z projekta ZARI ako fotowe knigły w dwěma zwězkoma wudała. Dogromady jo se źaseś eksemplarow zgótowało.