Z Janšojc/Jänschwalde. Wšuźi wiźimy tuchylu wólbne plakaty partajow, a to dla bliskich wuzwólowanjow do krajnego sejma w Bramborskej – te budu 22. septembra.

Pśed tym, 27. awgusta, jo wugótowała CDU-politikaŕka Susanne Sengowa z dalšnymi CDU-kandidatami zmakanje w swójej rodnej jsy Janšojce. Nejpjerwjej jo to šło do Mósta (Heinersbrück) k ERIDES GmbH wót Martina Gründera. Ako drugu staciju teje lěśojskeje tury su zastali w Serbsko-nimskem domowniskem muzeju w Janšojcach. Wjednica muzeja Rosemarie Tšukowa jo južo wšykno pśigótowała. We wótnapinajucej atmosferje jo wóna rozkładła, kak jo muzej natwarjony, a kak ceła wjas jen wužywa. Pódla politikarjow dr. Jan Redmann, Susanne Sengowa, Rene Kochan, Julian Brüning a Kay Drews su sejźeli hyšći pśedsedaŕ Domowiny David Statnik, jadnaŕ Domowiny Markus Końcaŕ a Cornelia Vahderowa ako cesnoamtska pomocnica tam za blidom.