Ze Złego Komorowa/Senftenberg. Za brach serbskich ceptarjow w Dolnej Łužycy njejo žedno malsne rozwězanje wótwiźeś. To jo wobtužecy ale njepśechwatajucy rezultat pósejźenja Serbskeje rady wałtoru, 27. awgusta. Za swójo pśedslědne pósejźenje pśed nowowólbami su se cłonki a wótpósłańce krajnego sejma w Złem Komorowje zmakali – tam, źož deje se serbske ceptarje za bramborske zakładne šule raz wukubłaś. Ale ga to buźo, to hyšći njejo jasne, lěcrownož pótrjeba kužde lěto stupa.

Peer Schmidt, wiceprezident za studij a wucbu na Bramborskej techniskej uniwersiśe Chóśebuz-Zły Komorow (BTU), jo Serbskej raźe rozkładł, kak BTU tuchylu nowy ceptaŕski studium za zakładne šule we Złem Komorowje na- a wutwarijo. Nimšćinu a matematiku mógu studenty južo studěrowaś, wěcna wěda a muzika skóro slědujotej. Ale aby teke serbski ceptaŕski studium zarědowała, felujo uniwersiśe až doněnta jasny politiski nadawk – na pśikład wobzamknjenje krajnego sejma abo wobzamknjenje bramborskego kněžaŕstwa, tak Schmidt.