Z Bórkow/Burg. Za wjele luźi w našom regionje su serbske nałogi a tradicije wažne, ale dajo jano małku gjarstku familijow, w kótarychž se serbska rěc ako mamina rěc dalej dawa. Na gluku ma wjele źiśi tu móžnosć, w šuli serbski wuknuś. Cesto njejo to Witaj-wucba, ale wuknjenje cuzeje rěcy. A bóžko ma jano mało źiśi móžnosć, swóje rěcne znaśa we wšednem dnju nałožowaś. Śim wažnjejšy jo projekt „Šula w zelenem“ Rěcnego centruma WITAJ w Chóśebuzu. We tom ramiku se zmakaju źiśi pětego lětnika ze wšakorakich šulow na tśi dny a w dwěma pśeběgoma, aby se intensiwnje zaběrali ze serbskeju rěcu a teke ze žywjenim a tradicijami Serbow. Lětosa, wót 11. do 15. septembra, jo 93 źiśi ze sedym zakładnych šulow w Bórkojskej młodowni pśebyło, aby toś ten rěcny projekt dožywili.

Wósebnej wjeraška lětosneje Šule w zelenem stej byłej cołnowanje pó idyliskich Błotach kaž teke woglěd Domowniskego muzeja w Dešnje. Mimo togo su źiśi wuknuli serbske reje a su mógali zuk serbskich instrumentow słuchaś. Až samo dajo serbske dudy, jo zaźiwało źiśi. Wjele šposa su z tym měli, wšakorake instrumenty sami wuproběrowaś.