Uwe Gutšmit jo w maju 2018 z wuknicu Ninu Reicheltojc wjadł pśez program k cesći Miny Witkojc. K njej jo ceptaŕ Gutšmit napisał kus, kótaryž su pokazali na jawišću. 
Z Bórkow/Burg. Towaristwo Ponašemu („njewótwisny zwězk serbsko- a nimskorěcnych Serbow a njeserbskich pśijaśelow“) eksistěrujo 24 lět, 1999 su jo swětki załožyli. Pśi tej góźbje jo se Stefanie Krawcojc za Nowy Casnik z pśedsedarjom towaristwa rozgranjała, to jo Uwe Gutšmit.
Nowy Casnik: Kak běžy pla towaristwa „Ponaschemu“?
Smy hyšći žywe. No, žort z boka: Towaristwo Ponašemu zawěsće nadalej eksistěrujo. Staramy se wó knigłowe projekty, pódpěrujomy Serbski sejm. Pśiduce lěto změjomy 25. jubilej załoženja, toś pišom nastawk wó nas za pśiducu „Serbsku Pratyju“.
Bydliš w Bórkowach a sy nam južo wšake wulicował dla wuwiśow w tamnej šuli, źož sy něga ceptarił. Ma Ponašemu stojnišćo k tomu?
