Z Łužyce/Lausitz. Polka-muzika spěchujo pla młogich, wósebnje pla młodych, wšake klišeje wó piwowych stanach, wó pśestarjetej dujaŕskej muzice, ku kótarejž stare póriki na jsach rejuju. Až toś ten muzikowy žanr móžo byś cełe hynakšy, ga moderny, wuwabny, pó modernej wašni rejowany a wósebnje wjelebocny, gaž jo měšany z drugimi muzikowymi stilami z wšakich krajow. To su kśěli zarědowarje dopokazaś z prědnym PolkaBeats-festiwalom w lěśe 2010. Zachadny kóńc tyźenja jo se wótměł 13. źěl togo małego, ale dobrego festiwala, a to stupny stwórtk w Chóśebuzu, pětk w Lubinje, sobotu w Lubnjowje a njeźelu ako zajtšne piwko z nimsko-českeju kapału Jindřich Staidel Combo w Łukowje (Luckau).