Ze Zušowa/Suschow. We tej jsy su něga měli wejsańsku šulu. Tam stej šularja Fryco Konnopke a Willi Schackla (ten slědny jo teke był „Blockwart“), ceptariłej a pisałej chroniku wót lěta 1900 do 1940, ako su zacynili tu šulu. Tam stoj, kak luźe we tej serbskej jsy su za zdaśim ceptarjowu dolabowali kejžorski cas, swětowu wójnu, swětowu góspodaŕsku krizu, nacionalsocializm a zachopjeńk drugeje swětoweje wójny. We swójich lětnych rozpšawach dokumentěrujotej ceptarja swój wid na góspodaŕsku situaciju, na žni, na wjedro, na situaciju we jsy a na swěśe. Wiźeś jo, až wónej stej pisałej kradu w nimskem zmysle resp. kak blisko stej byłej tencasnemu statnemu myslenjeju. Jo, wšake jo pisane we hitlarskem duchu kenž wopśimjejo teke to zašćuwanje luźi a to wótgódnośenje Słowjanow. Jaden móžo zapšawym jano warnowaś dla togo myslenja, kótarež se wótbłyšćujo we tej chronice, teke gaž to jo glědałko do łužyskeje zachadnosći.