Z Mósta/Heinersbrück. We tyźenju wót 18. do 22. julija smy se we hortowej źiśowni „W znamjenju lipy“ zaběrali z bajkami a powěsćami. To smy gótowali w ramiku ferijowego zaběranja. Smy słyšali bajki, wótkubłaŕki su je pśedcytali a wucowali. Wóni su je z wobrazkami wulicowali a su teke bajali to, což su znali ze zakładneje šule abo wót prědownikow. Awtorka pśinoska jo pśinjasła figurki, kótarež jo sama basliła. Z tymi figurkami a z wjele fantazije smy se zanurili do swěta powěsćow! Smy se kradu zaběrali z błudnikami a ze pśezpołdnicu. Za nich smy se wósebnje zajmowali. Toś smy z glinu kreatiwnje baslili błudniki, za naše śpy doma. Smy wobraze mólowali a pśipórali bajkowe nalipki w našych kupkowych śpach. Smy pón wót nich powědali w serbskej rěcy z pomocu našych booki-pisakow. Na taki part móžomy wšednje zwucowaś te serbske mjenja bajkowych póstawow, a se wopóznawaś ze wšednymi rěcnymi wobrotami a słowami. Wóni su wšuźi w našej hortowej źiśowni. To nam napóra wjele wjasela, a móžomy agěrowaś we dwěma rěcoma.