Z Budyšyna/Bautzen. Lětosna wurědna głowna zgromaźina Domowiny buźo pětk, 3. junija, zeger 17:00 w „Hali wuměłstwa Łužyca“ na Pśiwóznej droze / Güterzufuhrstraße 7 w Chóśebuzu. Jadnučka tema buźo to zarucenje pšawizniskeje płaśiwosći wót łońskeje głowneje zgromaźiny wobzamknjonych změnow wustawkow kšywowego zwězka. Ta 21. (wurědna) głowna zgromaźina pśewjeźo se na zakłaźe artikla 7 wótrězk 8 wustawkow Domowiny. Wóna ma wobtwarźiś změnu wustawkow Domowiny. Naraźenja su se wobšyrnje do głowneje zgromaźiny diskutěrowali. We tom procesu jo kuždy cłonk Domowiny měł góźbu, swóje naraźenja a pokazki zapódaś. Źěłowy prezidium głowneje zgromaźiny zestaja se z prezidiuma zwězkowego pśedsedaŕstwa a jadnarjow Domowiny. Wótběg głowneje zgromaźiny moderěrujo zastupujucy jadnaŕ Marcus Kóńcaŕ w dolnoserbskej rěcy.

Podłožki njejsu jano delegatam dojšli, ale su teke górno- a dolnoserbski a nimski na www.domowina.de pśistupne. Tam stej teke plan wótběga a jadnański pórěd .

Tomu se zeger 19:00 na samskem městnje wótwórjenje wustajeńce „Serbske wuměłce a Serby we wuměłstwje“ pśizamknjo.