Nowolětka za krajnego raźca

Von Wokrejs SPN Donnerstag, 13. Januar 2022
Krajny raźc Harald Altekrüger a Kerstin Kosakowa stej dostałej nowolětki. Pjakli su je janšojske wukniki. Foto: Wokrejs SPN
Z Baršća/Forst. Krajny raźc wokrejsa Sprjewja-Nysa, Harald Altekrüger, jo dostał k zachopjeńkoju nowego lěta wósebnu pśechwatanku. W slědnych dnjach decembra su wuknice a wukniki serbskeje zakładneje šule „Krabat“ w Janšojcach – z pódpěru ceptaŕkow – zgótowali nowolětka, małe tradicionelne pjacywa ze solowego śěsta we formje zwěrjetow, figurkow, wěncow abo wutšobow. Zgromaźe z nejlěpšymi žycenjami za 2022 su te źiśi swóje wupjacone nowolětka (nimski su tek znate ako „Neujährchen“) pósłali do wokrejsnego domu w Baršću. Kradu jo se wjaselił krajny raźc, ako jo wótcynił wóny darjeński kofer, kenž jo jomu Kerstin Kosakowa, zagronita za serbske nastupnosći we wokrejsu Sprjewja-Nysa, pśepódała. „Wjaselim se wjelgin, až se źiśi janšojskeje zakładneje šule na taku kreatiwnu wašnju z tradicijami swójich serbskich prědownikow zaběraju a až su pśi rozdawanju swójich talismanow teke na wokrejsne zastojnstwo se myslili. Za to mój wutšobny źěk, teke w mjenju zastojnstwa. To jo mały dar z wjelikim pozitiwnym pósołstwom, kenž ako krajny raźc rady do nowego lěta sobu wzejom.
(0 )
Bitte anmelden, um einen Kommentar zu posten