Serbska duša jo žywa

w Ptačecach

Z Ptačec/Tätzschwitz. Źěłowa kupka Serbska namša jo zagronita za cerkwine žywjenje serbskeje wósady. Mimo organizacije serbskich namšow w Dolnej Łužycy se stara w pśiběrajucej měrje teke wó namšach w srjejźnej Łužycy. W lěśe 2010 jo iniciěrował Ginter Pawliš prědnu dwójorěcnu namšu we złykomorojskej Serbskej cerkwi. Lětosa su tam swěśili rědnu ekumenisku namšu ku dnju Marijinego do-njebja-stupjenja. Aktiwity we Złem Komorowje su wuskoboźili druge luźi w regionje, teke zasej serbsku rěc w cerkwi zazněś daś. Tak jo łoni wósada w Ptačecach prědny raz pśepšosyła na serbsko–nimsku namšu. Nicht njej mógł se dopominaś, ga su byli serbske słowa słyšaś slědny raz we cerkwicce teje jsy něźi dwanasćo kilomejtarjow na dłujkem wjacorje wót Wórjejc.