Z Města/Cottbus. Južo pśed lěśojskimi prozninami jo se rozsuźił engelski wugbaśowy kurs Dolnoserbskego gymnaziuma (DSG) za to, pomagaś źiśam, ako njamaju take dobre žywjenje. Gromaźe z Tobiasom Geisom, ceptaŕ za serbšćinu a engelšćinu, su se wukniki dwanasteje rědownje do źěła dali.
Z pomocu pśijaśela Tobiasa Geisa, Ireri Waithavu, su starcyli na towaristwo „Home of Smile“. To jo Achim Fuchs 2013 załožył w kraju Kenija. Organizacija se zasajźijo za to, až maju syrotne, spušćone a pśenjeroźone źiśi městno, źož bydle, dostanu jězu a chójźe do šule. Starjejše tych źiśi su cesto wumrěli dla aidsa, tuberkuloze abo malarije. Z projektom dej nastaś dom, w kótaremž dostanu źiśi lubosć a wěstosć. Tuchylu chójźi 80 źowća a gólce do teje šule, a maju stakim dobru šansu na lěpšy pśichod.