Pśed pór lětami su bóžko wótryli dom w Radowizy, w kótaremž jo se dnja 19. oktobra 1891 naroźił Fryco Kitlaŕ. Tu wałtoru su stakim byli 130. narodniny togo serbskego ceptarja a wuměłca, kenž jo se wjele znatosći dobył wósebnje ze swójimi wustśigankami z ludowuměłskimi motiwami kaž teke z wugótowanim pismowych łopjenow ze serbskimi pśisłowami. Ale wjele drugego jo tek gótował, mjazy drugim jo wšake śišćańske techniki nałožował, z wuglom kreslił, pastele a akwarele mólował. Wó jogo twórjenju a wó běgu jogo žywjenja jo Nowy Casnik lětosa juž młoge pisał, ga ku góźbje jogo 40. pósmjertninow 22. maja (glej NC 21/27. maj 2021). Tam smy, wopacneje informacije dla, pisali až wěrjepódobnje wěcej njedajo žywe wósoby, ako su Fryca Kitlarja znali. Zmólka jo nam luto! Wósebnje matej se spomnjeś Christa Urbańscyna z Groźišća a jeje źowka, Katrin Urbańscyna, z Města. Wobej stej měłej bliski, familiarny póměr k njomu. Fryco Kitlaŕ jo ga był nejlěpšy pśijaśel nana Christy Urbańscyneje, ceptarja a kantora Hanza Hünchena.