Z Města/Cottbus. Zachadnu sobotu jo pšosyła serbska wuměłcowka Hella Stoleccyc (Stoletzki) na wernisažu w Galeriji Fango. W běgu wjacora jo se tam jadnab 70 luźi woglědało tu wósebnu premjeru, ako jo wóna wótwóriła swóju prědnu solo-wustajeńcu. Za towaristwo „Kulturforum Cottbus“, kenž jo nosaŕ galerije, jo to teke była prědna wustajeńca wót zachopjeńka korona-pandemije.

W nagronje na serbski a nimski jo Hella Stoleccyc se wuźěkowała gósćam, pomocnikam, teamoju galerije a Kolektiwoju Wakuum, kenž jo ten swěźeń sobu organizěrował. Wóna jo se teke wuźěkowała Serbskemu wuměłskemu drustwoju Swobodny Społk, ako ju mjazy drugim financielnje pódpěrujo. Pótom jo młoda wuměłcowka pśipowěźeła muzikaliski projekt „6litch8itch“ (z drugeju muziku teke znaty ako „SO BEAST“), duo z Italskeje, kenž jo zagrał elektronisku live-muziku.