W septembrje pśed 20 lětami su w sćelaku MDR prědny raz wusćełali telewizijny program w górnoserbskej rěcy: WUHLADKO (wuglěd) se jomu groni, wón jo 30 minutow dłujki a jo k wiźenju kuždy mjasec raz, a to pśecej prědnu sobotu we wobjedowem casu. Wón se teke raz wóspjetujo w MDR a jaden raz w telewiziji RBB. Rowno tak ako dolnoserbski program „Łužyca“, kótaryž mamy južo z lěta 1992, su k tomu pódane pisnje nimske teksty.

Dnja 4. septembra su pśi góźbje togo jubileja pokazali wósebne wusćełanje WUHLADKA. Pśiglědarje su wiźeli wažne a zajmne wurězki z doněntejšnych programow a k tomu měnjenja a gratulacije a tek dopomnjeńki něgajšnych a něntejšnych redaktorkow a redaktorow togo woblubowanego górnoserbskego telewizijnego magacina.